މިހާރު ބީއެމްއެލްއަކު ޑޮލަރެއް ނެތް: ރައީސް ނަޝީދު

ޤައުމީ ބޭންކު ބީއެމްއެލްގައި މިހާރު ޑޮލަރެއް ނެތް ކަމަށާއި، އާއްމުންގެ ޓްރާންސްފަރ ތަކާއި ޓީޓީތައްވެސް ވަނީ ހުއްޓިފައި ކަމުގައި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، އިންޑިއާ ބޭންކަށް ސަރުކާރުން ދައްކަންޖެހޭ 150 މިލިއަން ޑޮލަރު ދައްކާފައިވާކަމަށް ސަރުކާރުން ހާމަކުރުމާއި ގުޅިގެން އެކަމާއި ގުޅުވައި ސޯޝަލްމީޑިއާގައި ކުރެއްވި ޕޯސްޓްގައެވެ.

ރައީސް ނަޝީދު ވިދާޅުވީ، 150 މިލިއަން ޑޮލަރުގެ ޓްރެޒަރީ ބިލް (ޓީ-ބިލް) ފެސިލިޓީއަށް ދައްކަންޖެހޭ ފައިސާ ސަރުކާރުން ދައްކާފައި ވަނީ، އަތުޖެހުނު ހުރިހާ ޑޮލަރެއް ބޭނުންކޮށްގެން ކަމަށާއި، އެ ދަރަނި ދައްކަން ޖެހުނީ ދަރަނި ދެއްކުން ފަސްނުކުރުމުން ކަމަށެވެ.

އޭގެ ނަތީޖާއަކީ، ރާއްޖޭގެ އިޤުތިޞާދުގައި ދައުރުވާ ހުރިހާ ޑޮލަރެއް ހުސްވުންކަމަށާއި، އެދަރަނި ދެއްކުމަކީ އަތްތިލަބަޑި ޖަހައި ސިޔާސީ ޕޮއިންޓް ހޯދާންވީ ކަމެއް ނޫންކަމުގައި ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، މިސަރުކާރަށް މިކަމެއް (ރާއްޖޭގެ އިޤުތިޞާދު ހަމަމަގަށް އެޅުން) ނުވިކަމަށާއި، ވެރިކަމަށް ވަޑައިގަންނަވަމުން، ރައީސް ޑރ. މުޙައްމަދު މުޢިއްޒު ވިދާޅުވީ، ކުރީ ސަރުކާރުގެ ދަރަނި ރީސްޓްރަކްޗަރކޮށް ދިވެހިންނަށް ލުއިގޮތް ހޯދައިދޭނެ ކަމަށް ކަމުގައެވެ، އެހެން ނަމަވެސް ރައްޔިތުންނަށް ވީ، އަދި ވަނީ ހައްތަހާ ބުރަ ކަމުގައި ރައީސް ނަޝީދު ވަނީ ވިދާޅުވެފައެވެ.

ރައީސް ނަޝީދު އިއްޔެ ވިދާޅުވީ، އިންޑިއާއަށް ދައްކަންޖެހޭ މިދަރަނި ދެއްކުމުން، މަރުކަޒީ ބޭންކުގެ ޔޫސަބަލް ރިޒާވް ހުސްވެގެންދާނެ ކަމަށާއި، މިއަދުން ފެށިގެން އަސާސީ ކާބޯތަކެއްޗާއި ތެލާއި ބޭސް ގެނައުމަށް ދޫކުރާނެ ޑޮލަރެއްވެސް މަރުކަޒީ ބޭންކުގައި ނުހުންނާނެ ކަމަށެވެ.

ރާއްޖޭގެ އިޤުތިޞާދީ ޙާލަތު ވަރަށް ބޮޑަށް ގޯސްވެ ޑޮލަރުގެ ތާށިކަން އިންތިހާއަށް ބޮޑުވުމުން، ޑޮލަރު ލިބޭނެ މަގުތައް ފަހިކުރުމަށާއި، ރާއްޖެއިން ޑޮލަރު ބޭރުވާ މިންވަރު މަދުކުރުމަށް ސަރުކާރުން ވަނީ ޤާނޫނުތަކަށް އިސްލާޙްގެނެސް ފިޔަވަޅުތައް އަޅަން ފަށާފައެވެ. އެހެން ނަމަވެސް އެފިޔަވަޅުތަކުގެ ސަބަބުން އިޤުތިޞާދީ ހާލަތު އިތުރަށް ދަނީ ގޯސްވަމުން ކަމުގައި، ރާއްޖޭގެ މާލީ ދާއިރާގެ ތަޖުރިބާކާރުންނާއި، ބޮޑެތި ވިޔަފާރިތަކުން ދަނީ ބުނަމުންނެވެ.