ފައްޔާޒު ހުށައެޅުއްވި ބޮޑު ބަދަލު ކޮންގްރެސްއިން ފާސްކޮށްފި

ރާއްޖޭގެ ވެރިކަމުގެ ނިޒާމް ބަދަލުކުރުމަށްޓަކައި، އެޕާޓިގެ ކުރިގެ ޗެއާޕަރސަން ފައްޔާޒް އިސްމާޢިލް ޕާޓީގެ ކޮންގްރެސްއަށް ހުށައެޅުވި ޤަރާރު އެމްޑީޕީގެ ކޮންގްރެސްގެ އަޤުލަބިއްޔަތުން ފާސްކޮށްފިއެވެ.

ފައްޔާޒް ހުށަހެޅުއްވި "ބޮޑު ބަދަލު" ކަރުދާސް ފާސްވެފައި ވަނީ 520 ވޯޓުންނެވެ.

މިއީ ރައީސް ނަޝިދު އެމްޑީޕީގެ ޗެއާޕަރސަންގެ މަޤާމަށް ކެމްޕޭން ކުރެއްވި އިރު އިޢުލާނު ކުރެއްވި ބޮޑު ބަދަލުގައި ހިމަނާފައިވާ ކަންކަން ތަންފީޒުކުރުމަށް މަގު ފަހި ކުރުމަށްޓަކައި ހުށައެޅި ކަރުދާހެކެވެ.

މި ބަދަލުގައި ދައުލަތުގައި އިސް ދެވެރިއަކު ތިބޭ ގޮތަށް ހިމަނާފައި ވެއެވެ. އެއީ ދައުލަތުގެ ވެރިޔާ އާއި ސަރުކާރު ހިންގުމުގެ ވެރިޔާއެވެ. އެދެ މަޤާމުގެ ތެރެއިން ދައުލަތުގެ ވެރިޔާ އަކީ، އާއްމު ސިއްރުވޯޓަކުން ހޮވާ ފަރާތެއްގެ ގޮތުގައި ކަނޑައަޅައި، ސަރުކާރު ހިންގުމުގެ ވެރިޔާ ހޮވާނީ، ރައްޔިތުންގެ މަޖިލިހާއި، ކައުންސިލް މެމްބަރުންގެ ވޯޓުން ކަމުގައި ހިމަނާފައި ވެއެވެ.

މިގެ އިތުރުން ބޮޑު ބަދަލުގައި ހުށައަޅާފައިވާ މުހިއްމު އަނެއް ކަމަކީ، ޝަރުޢީ ނިޒާމް މިނިވަންކަމާއި މުސްތަޤިއްލުކަމާއި އެކު ހިންގުމަށް ހުށައަޅާފައިވާ ބަދަލުތަކެވެ.

ރާއްޖޭގެ ވެރިކަމުގެ މުޅި ނިޒާމް ބަދަލު ކުރުމަށް އެމްޑީޕީން އަންނަނީ މަސައްކަތް ކުރަމުންނެވެ. 2007 ވަނަ އަހަރު ނެގި ނިޒާމީ ވޯޓުގައި، އެމްޑީޕީން ތާއީދު ކުރީ ބަރުލަމާނީ ނިޒާމަށެވެ. އެހެން ނަމަވެސް ރައްޔިތުންގެ އަޣުލަބިއްޔަތުން ނިންމާފައި ވަނީ، ރާއްޖޭގައި އޮންނަން ފެނަނީ، ރިޔާސީ ނިޒާމެއް ކަމަށެވެ.