އެގްރި ބޯޓުގެ ދަތުރުތައް ފަށައިފި

ރާއްޖޭގެ ދަނޑުވެރިންގެ އުފެއްދުންތައް ފަސޭހަ ކަމަާއެކު މާލޭގެ ބާޒާރަށް ގެނައުމަށްޓަކައި، އެގްރޯ ނެޝަނަލް ކޯޕަރޭޝަން (އެގްރޯނެޓް) އިން ބަނދެފައިވާ އެގްރިބޯޓުގެ މަސައްކަތް ރަސްމީކޮށް ފަށައިފިއެވެ.

މި ބޯޓުގެ ފުރަތަމަ ދަތުރު ކުރާ ގޮތައް ހަމަޖެހިފައި ވަނީ މާލެއިން ހައްދުންމައްޗަށެވެ. ފުރަތަމަ ދަތުރުގައި ބޯޓު ހައްދުންމަތީގެ އެކި ރައްރަށުގެ ދަނޑުވެރިން، ހައްދާ ދަނޑު ގޮވާން ބަރުކޮށްގެން، މޫސުން ތަންދިީފިނަމަ މި މަހުގެ 21 ވަނަ ދުވަހު އެނބުރި މާލެ އައުމަށް ވަނީ ހަމަޖެހިފައެވެ.

މި ދަތުރުގައި އެކިބަަވަތް ތަކުގެ މޭވާ އާއި ތަރުކާރީ ހިމެނޭހެން ޖުމްލަ 11,200 ކިލޯގްރާމްގެ ދަނޑުވެރިކަމުގެ ބާވަތްތައް މާލެ ގެނައުމަށް ވަނީ ހަމަޖެހިފައެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދު ފުޅުގެ ތެރޭގައި ހިމެނޭ ވަޢުދު ފުޅެކެވެ.

ރައީސުލް ޖުމްހޫރިއްޔާ ގެ ވަޢުދު ފުޅުތަކުގެ ތެރޭގައި ރާއްޖޭގައި ދަނޑުވެރިކަންކުރާ ހުރިހާ ރަށެއްގެ ދަނޑުވެރިންނާ އެކު އެ ދަނޑުވެރިން ގޮވާންކުރާ ތަކެތި ގަތުމުގެ އެއްބަސްވުންތައް ޤާއިމުކުރުމާއި، ރާއްޖޭގެ ފުޑް ސެކިއުރިޓީ ނިޒާމު ކަށަވަރު ކުރުމަށް ލ. ބަރެސްދޫގައި މަޝްރޫޢެއް ހިންގުމުގެ އިތުރުން އއ. އަރިއަދޫގައި ރުއް އާލާ ކުރުމުގެ ޕްރޮގްރާމެއް ހިންގުން ހިމެނެއެވެ.

ހަމައެއާއެކު ލ.ގާދޫގައި ވެސް ވަނީ މީގެ ދުވަސް ތަކެއް ކުރިން ފުޅާދާއިރާއެއްގައި އެގްރޯ ނެޓުން އިސްނަންގަވައިގެން ދަނޑުވެރިކަމުގެ މަސައްކަތްތައް ފަށާފައެވެ.

ނަމަވެސް ވެރިކަން ބަދަލު ވުމުން ދިމާވި ހީނަރު ކަމެއްގެ ސަބަބުން އެތަނުގައި އެވަގުތު މަސައްކަތް ކުރަމުން އައި ބިދޭސީން ފޮނުވަަލުމުން ދަނޑު ވެރިކަން ވަނީ ހުއްޓިފައެވެ. ނަމަވެސް އަދިވެސް ލ.ގާދޫގައި އެގްރޯ ނެޓްގެ މުވައްޒަފުން ވަޒީފާ އަދާކުރަމުން ދެއެވެ. މިވަގުތު ގާދޫ ބޭނުންކުރަމުން ދަނީ ކާށި ބޭރު ކުރުމަށެވެ.

އެގްރޯނެޓުން ހާމަކޮށްފައިވާ ގޮތުގައި މި ހުރިހާ މަޝްރޫޢުތައް ފެށުމަށް ޖެހޭ އެންމެފަހުގެ ތައްޔާރީތައް އަންނަނީ ވަމުންނެވެ. ދަނޑުވެރިކަމުގެ ސިނާޢަތު އިތުރައް ހަރުދަނާކޮށް، ދަނޑުވެރިންގެ އިޤްތިސޯދީ ދިރިއުޅުމުގެ ފެންވަރު ރަނގަޅުކުރުމުގެ ގޮތޮން ސަރުކާރުން ކުރަމުންދާ މަސައްކަތްތަކުގެ ތެރެއިން އެގްރި ބޯޓުގެ ދަތުރުތައް ފެށިގެން ދިއުމަކީ ދިވެހި ރާއްޖޭގައި ދަނޑުވެރިންނަށް ލިބިގެންދާނެ ވަރަށް ބޮޑު ފަސޭހައެކެވެ.

ޚަބަރު ލިޔުނީ: އަޙްމަދު ޝިޔާން - ރަށުރިޕޯޓަރ