ކަރަންޓް ފޮއްޓެއްގައި ރޯވެ އިންނަމާދޫން ކަރަންޓް ކެނޑިއްޖެ

މިއަދު މެންދުރުފަހު އިންނަމާދޫއަށް ބޯކޮށް ވާރޭ ވެހި މަގުމަތީގައި ހުރި ކަރަންޓް ޑިސްޓްރިބިއުޝަން ފޮއްޓަކަށް ފެން އެޅި، އެފޮށީގައި ރޯވެ ބައެއް ސަރަހައްދުތަކުން ކަރަންޓް ކެނޑިއްޖެއެވެ.

މިހާދިސާ ހިނގީ މިއަދު މެންދުރު ފަހު 15:30 ހާއިރުގައެވެ.

އިންނަމާދޫ ފެނަކަ ބުރާންޗްއިން މައުލޫމާތު ދިން ގޮތުގައި، ކަރަންޓް ޝޯޓުވެ އަލިފާނުގެ ހާދިސާ ހިނގި ޑިސްޓްރިބިއުޝަން ފޮށި ބަދަލުކޮށް އެސަރަހައްދުގެ ގޭގެއަށް އަލުން ކަރަންޓްގެ ޚިދުމަތް ދިނުމުގެ މަސައްކަތް ދަނީ ކުރަމުންނެވެ. އެހެން ނަމަވެސް އިރު އޮއްސުމުގެ ކުރިން ކަރަންޓްގެ ޚިދުމަތް ނުލިބިދާނެ ކަމަށާއި އެހެން ނަމަވެސް ވީހާވެސް އަވަހަކަށް މައްސަލަ ހައްލުކުރުމަށް ޓެކްނީޝަނުން އަންނަނީ މަސައްކަތް ކުރަމުން ކަމުގައި ފެނަކައިން ވަނީ ބުނެފައެވެ.

އިންނަމާދޫގައި ބޭނުން ކުރަމުން އަންނަ ކަރަންޓްގެ ނެޓްވޯކަކީ، ބަދަލުކުރަން ޖެހިފައިވާ ޒަމާންވީ ނެޓްވޯކެކެވެ. އައު ނެޓްވޯކު އެޅުމުގެ މަސައްކަތް ކުރުމަށް 2024 ވަނަ އަހަރު ސަރވޭކޮށް ނިންމާފައި ވީނަމަވެސް، އައު ކަރަންޓް ކޭބަލް ނެޓްވޯކު އެޅުމުގެ މަސައްކަތް އަދި ފެށިފައެއް ނުވެއެވެ. އެހެންވެ ދިމާވަމުން އަންނަ ކަރަންޓްގެ މައްސަލަތަކާއި ގުޅިގެން ރަށުގެ ރައްޔިތުންގެ މެދުގައި ކަންބޮޑުވުންތައް އެބައޮތެވެ.

މިއަދު މެންދުރުފަހު، ރ. އިންނަމާދޫއަށް ބޯކޮށް ވާރޭ ވެހުމުގެ ސަބަބުން ގިނަ ގެތަކެއްގައި ފެންބޮޑުވެ ގެއްލުންތައް ލިބިފައިވާއިރު، ކޯރު ކަނޑައި ރަށުތެރެއިން ފެން ހިންދުމުގެ މަސައްކަތް މިހާރު އަންނަނީ ކުރަމުންނެވެ.

ޚަބަރު ލިޔުނީ: ޙަސަން ސާތިޢު - ރަށުރިޕޯޓަރ