އެފްއެސްއެމްއިން ޖެޓީތަކުން ލޯންޗުތަކަށް ތެޔޮވިއްކާ އަގު ބޮޑުކޮށްފި

ޖެޓީތަކުން، ލޯންޗުތަކަށް ތެޔޮ ވިއްކާ އަގު ފިއުލް ސަޕްލައިން ބޮޑުކޮށްފައިވާ ކަމުގައި ބައެއް ލޯންޗު ދަތުރުތައް ކުރާ ފަރާތްތަކުން ބުނެފިއެވެ.

އަތޮޅުތަކަށް ފެރީ ލޯންޗުތައް އޮޕަރޭޓް ކުރާ ފަރާތަކުން ބުނީ، ފިއުލް ސަޕްލައި އިން ތެލުގެ އަގު ބޮޑުކޮށްފައި ވަނީ މީގެ ދެ ހަފްތާކުރިން މިމަހުގެ 16 ވަނަ ދުވަހުގައި ކަމަށާއި، އަގަށް ގެނައި އެބަދަލުތައް އާއްމުކޮށް އިއުލާނުކޮށްފައި ނުވާކަމަށެވެ.

ޖުލައިމަހު އެންމެފަހުން އަގުތަކަށް ވަދަލު ގެނައި އިރު، ޕެޓްރޯލް ލީޓަރެއް ވިއްކަމުން ދިޔައީ، 17 ރުފިޔާ 39 ލާރިއަށެވެ. އަދި ޑީސަލް ލީޓަރެއް ވިއްކަމުން ދިޔައީ، 22 ރުފިޔާ 84 ލާރިއަށެވެ.

ސެޕްޓެމްބަރު މަހުގެ، 16 ވަނަ ދުވަހުން ފެށިގެން ހުޅުމާލެ ޖެޓީން ޕެޓްރޯލް ލީޓަރެއް ވިއްކަމުން ދަނީ، 17 ރުފިޔާ 79 ލާރިއަށެވެ. އަދި ޑީސަލް ލީޓަރެއް ވިއްކަމުން ދަނީ، 24 ރުފިޔާ 82 ލާރިއަށެވެ.

ޖެޓީން ވިއްކާ ތެލުގެ އަގަށް ބަދަލު ގެންނައިރު، ފިއުލް ސަޕްލައި އިން އާއްމުކޮށް އިއުލާނު ނުކުރި ނަމަވެސް، ޝެޑުތަކުން ވިއްކާ ތެލުގެ އަގަށް ބަދަލު ގެންނައިރު، އެކަން އެސްޓީއޯއިން އާއްމުކޮށް އިއުލާނު ކުރެއެވެ. ޝެޑުތަކުން ވިއްކާ ޕެޓްރޯލާއި ޑީސަލްގެ އަގުތަކަށް މިސެޕްޓެމްބަރު މަހު ބަދަލެއް ގެނައިކަން ހާމަކޮށްފައެއް ނުވެއެވެ،