ދެކުނު ސޫދާނުގައި ރަން ނަގާ މައިނެއްގެ ތެރޭގައި ތާށިވެ 82 މީހުން މަރުވެއްޖެ

ދެކުނު ސޫދާނުގައި ރަން ނެގުމުގެ މަސައްކަތް ކުރަމުން ދިޔަ މައިނެއްގެ ތެރޭގައި ހިނގި ވެލިގަނޑު ކަނޑައިގެން ދިޔުމުގެ ހާދިސާއެއްގައި 82 މީހުން މަރުވެއްޖެއެވެ.

އަންގާރަ ދުވަހު ހިނގި މިހާދިސާގައި 10 މީހުން ސަލާމަތް ކުރެވުނު އިރު، ވެލިގަނޑު ދަށުން މަރުވެފަިއވާ 60 މީހުން ގެ މަރުވެފައިވާ ހަށިތައް އިއްޔެ ވަނީ ފެނިފައެވެ. އަދި މިއަދު 22 މީހެއްގެ މަރުވެފައިވާ ހަށިތައް މައިންގެ ތެރެއިން ނަގާފައި ވެއެވެ. މިހާދިސާގައި ގެއްލުނު މީހުންގެ ސީދާ އަދަދު ނޭނގޭއިރު މަރުވި މީހުންގެ އަދަދު އަދިވެސް މައްޗަށްދާނެ ކަމަށް ކަމަށް ވަނީ ބެލެވިފައެވެ. އަދި ހާދިސާގައި 50 ވުރެ ގިނަ މީހުން ޒަޚަމްވިކަމަށްވެސް ރިޕޯޓްތައް ބުނެއެވެ.

ރަންނަގާ އެމައިންގެ ތެރޭގައި މަރުވި ގިނަ މީހުންނަކީ، ދުވަހު މުސާރައަށް މައިންގައި މަސައްކަތް ކުރަމުން ދިޔަ މީހުންނެވެ. އެމީހުން މައިންތަކުގައި ބޭނުން ކުރަނީ، ވަރަށް އާދައިގެ ހަތިޔާރު ނުވަތަ ހުސްއަތެވެ. މީގެ އިތުރުން މައިންތަކުގައި ރައްކާތެރިކަމުގެ ފިޔަވަޅުތައްވެސް ވަރަށް ދަށް ކަމަށާއި، އެއާއެކު ސޫދާނުގައި މިފަދަ ހާދިސާތައް ހިނގުން އިތުރުވެފައިވާ ކަމުގައި، ސޫދާނުގެ ރަސްމީ ފަރާތްތަކުން ބުނެއެވެ.

ސޫދާނުގައި އެންމެ ގިނައިން މައިންކޮށްގެން ރަން ނަގަނީ، ޔޫއޭއީން އުފައްދާފައިވާ ކުންފުނިތަކުންނެވެ. އެކުންފުނިތަކުންވެސް ގިނައިން މައިންތަކުގައި ގެންގުޅެނީ ދުވަހު މުސާރައަށް މަސައްކަތް ކުރާ ފަޤީރު އާއްމު މީހުންނެވެ.