އިނގިރޭސިވިލާތުން ކަނޑުމަހުގެ ޑިއުޓީ ކަނޑާލުން: ރާއްޖެއަށް މީގެ ފައިދާ ކުރާނެ، ނަމަވެސް މިނިންމުމުގެ އަސްލަކީ ކޮބާ؟

މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން ތަކެތީގެ އަގު އުފުލެމުންދާތީ، އެ ގައުމުގެ އެތެރޭގެ އިގްތިސާދަށް ލުޔެއް ހޯދައިދިނުމުގެ ގޮތުން އިނގިރޭސިވިލާތުން ވަނީ ކަނޑުމަހާއި އެހެނިހެން ބައެއް ކާބޯތަކެތިން ނަގަމުން އައި އިމްޕޯޓް ޑިއުޓީ ވަގުތީ ގޮތުން މެދުކަނޑާލާފައެވެ. މި ނިންމުމަކީ ވަކި ގައުމަކަށް އިސްތިސްނާއެއް ނެތި، ހުރިހާ ގައުމުތަކަކަށްވެސް ހަމަހަމަކޮށް ހިނގާނެ އުސޫލެކެވެ. މިއީ އިނގިރޭސިވިލާތާއި ރާއްޖެއާ ދެމެދު ވެފައިވާ ވަކި ޚާއްޞަ ވިޔަފާރީގެ އެއްބަސްވުމެއް ނޫނެވެ.

ދިވެހި ސަރުކާރުގެ އިސް ބައެއް ފަރާތްތަކާއި ސިޔާސީ ބޭފުޅުން މިކަމަކީ މި ސަރުކާރުން ހޯދި ޚާރިޖީ ބޮޑު ކާމިޔާބީއެއްގެ ގޮތުގައި އާންމުންގެ ކުރިމަތީގައި ސިފަކުރައްވަމުން ގެންދެވި ނަމަވެސް، ކަން ހިނގާފައިވާ އަސްލު ގޮތަށް ބަލާއިރު ހަގީގަތް އޮތީ މިއާ މުޅިން އިދިކޮޅަށެވެ.

އިނގިރޭސި ސަރުކާރުން ނިންމި ނިންމުމުގެ ހަގީގަތް:

އިނގިރޭސި ސަރުކާރުން ހާމަކޮށްފައިވާ ގޮތުގައި، ދަނޑުވެރިކަމުގެ ބައެއް ބާވަތްތަކާއި ކާބޯތަކެތިން ޑިއުޓީ ކަނޑާލަން ނިންމީ، މެދުއިރުމަތީގެ ހަމަނުޖެހުންތަކާ ގުޅިގެން ތަކެތީގެ އަގު އުފުލެމުންދާތީ، އެ ގައުމުގެ އާންމު އާއިލާތަކަށް ދިރިއުޅުމުގެ ޚަރަދުތަކުގައި ލުޔެއް ހޯދައިދިނުމުގެ މަގުސަދުގައެވެ. މިގޮތުން ޑިއުޓީ ކަނޑާލި ބާވަތްތަކުގެ ތެރޭގައި ކަނޑުމަހާއި، ޕާސްތާ އާއި، މޭވާގެ ދިޔަ (ޖޫސް) އަދި އާންމުކޮށް ބޭނުންކުރާ އެހެނިހެން އަސާސީ ކާބޯތަކެތި ހިމެނެއެވެ. މި ފިޔަވަޅު 31 ޑިސެމްބަރު 2028 އާ ހަމައަށް ދެމިއޮންނާނެ ކަމަށް ވަނީ ކަނޑައަޅާފައެވެ.

މި ނިންމުމުގެ ދަށުން ޕާސްތާ، ޖޫސް، ކަނޑުމަސް، އޮރެންޖް އަދި އާންމުކޮށް ކައިބޮއި އުޅޭ ގިނަ ބާވަތްތަކަކުން ވަނީ ޑިއުޓީ ކަނޑާލާފައެވެ. އިނގިރޭސި ޓްރެޜަރީން ހާމަކުރި ގޮތުގައި، މި ފިޔަވަޅުގެ ސަބަބުން 2 ބިލިއަން ޕައުންޑަށްވުރެ ގިނަ އަގުހުރި އިމްޕޯޓް މުދަލަށް އަސަރުކުރާނެއެވެ. މީގެ މައިގަނޑު އަމާޒަކީ ފިހާރަތަކުން މުދާ ގަންނައިރު އާންމުންނަށް ލިބޭ އަގުތައް ހެޔޮކުރުމެވެ. އަދި މި ލިސްޓުގައި ހިމަނާފައިވަނީ އިނގިރޭސިވިލާތުގައި އުފައްދާ މިންވަރު މަދު، ނުވަތަ އެއްގޮތަކަށްވެސް އެ ގައުމުގައި ނުއުފައްދާ ބާވަތްތަކެވެ.

ކަނޑުމަހުގެ ޑިއުޓީ ކަނޑާލުމަކީ އިނގިރޭސިވިލާތުން އަމިއްލައަށް ނިންމި، ދުނިޔޭގެ ހުރިހާ ގައުމަކަށް ހަމަހަމަކޮށް ހިނގާނެ އާންމު އުސޫލެކެވެ. މިއީ އިނގިރޭސިވިލާތާއެކު މިނިވަން ވިޔަފާރީގެ އެއްބަސްވުމެއް ނެތް ކޮންމެ ގައުމަކަށްވެސް ލިބޭނެ ފުރުސަތެކެވެ. އެހެންކަމުން، ތައިލެންޑާއި، އެކުއެޑޯ އަދި ސްރީލަންކާ ފަދަ، ދުނިޔޭގެ ކޮންމެ ގައުމަކުން ކަނޑުމަސް އެކްސްޕޯޓް ކުރި ނަމަވެސް، އެ ގައުމަކަށް މި ލުއި ހަމަހަމައަށް ލިބޭނެއެވެ. މިއީ އެއްވެސް ގައުމަކުން ވަކިން ބާރުއަޅައިގެން ނުވަތަ ވަކި ގައުމެއްގެ މަސްވެރިކަމުގެ ސިނާއަތަށްޓަކައި މަޝްވަރާކޮށްގެން ހާސިލުކުރި ކަމެއް ނޫނެވެ.

ދިވެހި ސަރުކާރުގެ އިސް ބޭފުޅުން މިކަމާ ގުޅިގެން ފާޅުކުރެއްވި ޝުޢޫރުތައް

މި ނިންމުން އާންމުކޮށް އިޢުލާނުކުރީ 20 މޭ 2026 ގައެވެ. އިނގިރޭސިވިލާތުން ރާއްޖެއަށް ކަނޑައަޅާފައި ހުންނަވާ ހައިކޮމިޝަނަރު ނިކް ލޯ، މި ޚަބަރު ފެތުރުނުތާ މަދު ގަޑިއިރުތަކެއްގެ ތެރޭގައި އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ އިނގިރޭސިވިލާތުގެ ކަސްޓަމަރުންނަށާއި ދިވެހި މަސްވެރިންނަށް ލިބުނު ވަރަށް އުފާވެރި ޚަބަރެއް ކަމަށެވެ. "އިނގިރޭސިވިލާތުން ކަނޑުމަހުގެ ޑިއުޓީ ކަނޑާލުމަކީ، އެ ގައުމުގައި ތަކެތީގެ އަގު ހެޔޮވުމަށް އެހީތެރިވެދޭނެ ކަމެއް. ހަމައެއާއެކު، ދިވެހި ކަނޑުމަހަށް އިނގިރޭސި ބާޒާރުން ފަހި ފުރުސަތުތަކެއް މީގެ ސަބަބުން ހުޅުވިގެންދާނެ. މިއީ އަގު ހެޔޮވުމަށާއި، ދެމެހެއްޓެނިވި ގޮތެއްގައި ދޮށީގެ މަސްވެރިކަމުން ބާނާ މަހަށް ލިބުނު ކުރިއެރުމެއް،" އޭނާ ވިދާޅުވިއެވެ.

ރާއްޖޭގެ ސިޔާސީ ބޭފުޅުންވެސް ވަނީ ވަގުތުން މިކަމަށް މަރުހަބާ ވިދާޅުވެފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކްސްގައި ކުރެއްވި ޕޯސްޓެއްގައި މި ނިންމުމަށް މަރުހަބާ ވިދާޅުވަމުން ފާހަގަކުރެއްވި ގޮތުގައި، މިއީ އިނގިރޭސި ކަސްޓަމަރުންނަށް ލުޔެއް ލިބުމުގެ އިތުރުން ރާއްޖޭގެ މަސްވެރިކަމުގެ ސިނާއަތަށްވެސް ބޮޑެތި ފައިދާތަކެއް ކުރާނެ ކަމެކެވެ. ރައީސް ވިދާޅުވީ، "މީގެ ސަބަބުން މަސްވެރިންގެ އާމްދަނީ އިތުރުވެ، ރަށްރަށުގެ ދިރިއުޅުމުގެ ހާލަތު ރަނގަޅުވެ، ދެމެހެއްޓެނިވި ގޮތެއްގައި ބާނާ ދިވެހި މަހަށް އިނގިރޭސި ބާޒާރުގައި އޮތް ފުރުސަތުތައް ފުޅާވެގެންދާނެ،" ކަމަށެވެ. މީގެ އިތުރުން ރައީސް ވިދާޅުވީ، "މަސްވެރިންނަށާއި ރާއްޖޭގެ އިގްތިސާދަށް ލިބުނު މި ކުރިއެރުމުގައި ހިއްސާވި އިނގިރޭސި ސަރުކާރަށާއި ހުރިހާ ބައިވެރިންނަށް ޝުކުރު ދަންނަވަން،" ކަމަށެވެ.

މަސްވެރިކަމާ ބެހޭ ވަޒީރު އަޙްމަދު ޝިޔާމް މިކަން ސިފަކުރެއްވީ "މަސްވެރިންނަށާއި، އެމީހުންގެ އާއިލާތަކަށާއި، ރަށްރަށުގެ މުޖުތަމައުތަކުގެ އިތުރުން މަސް ބަންދުކުރާ ފަރާތްތަކަށް ލިބުނު ސީދާ ކާމިޔާބީއެއް" ގެ ގޮތުގައެވެ. އަދި "ދުނިޔޭގެ ފެންވަރުގައި ރާއްޖޭގެ މަސްވެރިކަމުގެ ސިނާއަތް ކުރިއެރުވުމަށް ރައީސުލްޖުމްހޫރިއްޔާ ދައްކަވަމުން ގެންދަވާ ސާބިތު އިސްނެންގެވުމަށްޓަކައި" އެމަނިކުފާނަށް އިޚްލާޞްތެރި ޝުކުރެއް ދެންނެވިއެވެ.

ޚާރިޖީ ވަޒީރު އިރުތިޝާމް އާދަމް ވިދާޅުވީ، ޑިއުޓީ ކަނޑާލުމަކީ "ދެ ގައުމަށްވެސް މަންފާކުރާނެ ކަމެއް" ކަމަށާއި، މިއީ "ރާއްޖެއާއި އިނގިރޭސިވިލާތުގެ ދެމެދުގައި އޮތް ޒަމާންވީ ގުޅުން އިތުރު ހަރުފަތަކަށް އުފުލިގެންދިޔަ ވަރަށް ހެޔޮ ފިޔަވަޅެއް" ކަމަށެވެ.

މަސްވެރިކަމާއި، ދަނޑުވެރިކަމާއި، ކަނޑުގެ ވަސީލަތްތަކާ ބެހޭ ވުޒާރާއިން ވަކިން ނެރުނު ބަޔާނެއްގައި ބުނެފައިވަނީ: "މަސްވެރިކަމުގެ ސިނާއަތަށް އިސްކަންދެއްވައި، ބައިނަލްއަގުވާމީ ގުޅުންތައް ބަދަހިކުރެއްވުމުގައި ރައީސް މުޢިއްޒު ދައްކަވާ ވަރުގަދަ ލީޑަރޝިޕަށްޓަކައި ޚާއްޞަ ޝުކުރެއް ދަންނަވަން،" ކަމަށެވެ.

ސަރުކާރުގެ މި މަރުހަބާގެ ބަސްތައް ސޯޝަލް މީޑިއާގެ އެކި މަންސަތަކުގައި ވަރަށް ފުޅާދާއިރާއެއްގައި ފެތުރިގެންދިޔައެވެ.

އިނގިރޭސިވިލާތުން މި ފިޔަވަޅު އެޅި ސަބަބު: މިއީ ވިޔަފާރީގެ ޚާއްޞަ އިނާޔަތެއް ނޫން، އެ ގައުމުގެ އެތެރޭގެ އިގްތިސާދީ ކާރިސާއާ ގުޅިފައިވާ ކަމެއް

އިނގިރޭސިވިލާތުން މިފަދަ ނިންމުމެއް ނިންމަން ޖެހުނު ސަބަބު ސާފުކޮށް ދެނެގަތުމަށްޓަކައި، އެ ގައުމުގެ އިގްތިސާދީ ހާލަތަށް ބަލާލުން މުހިންމެވެ.

28 ފެބުރުވަރީ 2026 ގައި އިސްރާއީލާއި އެމެރިކާއިން އީރާނަށް ދިން އަސްކަރީ ހަމަލާތަކާ ގުޅިގެން، އީރާނުން ވަނީ 'ސްޓްރެއިޓް އޮފް ހޯރްމޫޒް' ބަންދުކޮށްފައެވެ. މިއީ ދުނިޔޭގެ ތެލާއި ގޭހުގެ ވިޔަފާރީގެ ގާތްގަނޑަކަށް ފަސްބައިކުޅަ އެއްބައި ހިނގާ، ބައިނަލްއަގުވާމީ ގޮތުން އެންމެ މުހިންމު ކަނޑުގެ މަގެކެވެ. މި ސަރަހައްދު ބަންދުކުރުމާ ގުޅިގެން، އެ މަގުން ކުރާ މުދާ އުފުލުމުގެ ދަތުރުފަތުރުތައް ވަނީ މުޅިންހެން ހުއްޓުމަކަށް އައިސްފައެވެ.

މީގެ ސަބަބުން ފާރިސީ ގަލްފުގެ ގައުމުތަކުން ބޭރުކުރާ ތެލާއި ގޭހުގެ ސަޕްލައިއަށް ވަނީ ވަރަށް ބޮޑަށް ބުރޫއަރާފައެވެ. ބައިނަލްއަގުވާމީ ހަކަތައާ ބެހޭ އިދާރާ (IEA) އިން އަންދާޒާކުރާ ގޮތުގައި، 2026 ވަނަ އަހަރުގެ މާރިޗު މަހުގެ މެދާ ހަމައަށް އައިއިރު، ދުވާލަކު ގާތްގަނޑަކަށް 20 މިލިއަން ފީފާގެ ތެލަށް މިކަމުގެ އަސަރުކޮށްފައިވެއެވެ. އަދި ގަލްފުގެ ގައުމުތަކުން ތެޔޮ އުފައްދާ މިންވަރު މަދުވެގެން ދުވާލަކު 10 މިލިއަން ފީފާއަށް ދަށްވެފައިވާ ކަމަށްވެސް އެ އިދާރާއިން ފާހަގަކުރެއެވެ.

މި ބޮޑު އިގްތިސާދީ ލޮޅުމުގެ އަސަރުތައް މަދު ދުވަސްކޮޅެއްގެ ތެރޭގައި އިނގިރޭސިވިލާތުގެ އާންމު އާއިލާތަކާ ހަމައަށް ފޯރިއެވެ. އިނގިރޭސިވިލާތުގެ ކޮންސިއުމާ ޕްރައިސް އިންޑެކްސް (ސީ.ޕީ.އައި) ނުވަތަ އިންފްލޭޝަން ރޭޓް 2026 ވަނަ އަހަރުގެ ފެބުރުވަރީ މަހު ހުރި 3.0 އިންސައްތައިން، މާރިޗު މަހު ވަނީ 3.3 އިންސައްތައަށް އުފުލިފައެވެ. ހަމައެއާއެކު، ކާބޯތަކެތީގެ އަގުތައް އުފުލޭ ނިސްބަތްވެސް ވަނީ އޭގެ ކުރީ މަހު ހުރި 3.3 އިންސައްތައިން މާރިޗު މަހު 3.7 އިންސައްތައަށް މަތިވެފައެވެ.

އިނގިރޭސިވިލާތުގެ ބާރަހާހަށްވުރެ ގިނަ ކާބޯތަކެތި އުފައްދާ ކުންފުނިތައް ތަމްސީލުކުރާ 'ފުޑް އެންޑް ޑްރިންކް ފެޑެރޭޝަން' އިން ވަނީ، 2026 ވަނަ އަހަރު ނިމޭއިރު ކާބޯތަކެތީގެ އިންފްލޭޝަން މަދުވެގެން 9 އިންސައްތައަށް އުފުލިދާނެ ކަމުގެ އިންޒާރު ދީފައެވެ. މި އަންދާޒާގެ މައިގަނޑު ސަބަބަކީ މެދުއިރުމަތީގެ ހަމަނުޖެހުންތަކާ ގުޅިގެން ހަކަތައިގެ އަގުބޮޑުވުމާއި މުދާ ސަޕްލައިކުރުމުގެ ނިޒާމަށް އައިސްފައިވާ ބޮޑު ލޮޅުމެވެ. ބައިނަލްއަގުވާމީ މަނިޓަރީ ފަންޑް (އައި.އެމް.އެފް) އިން ވަނީ 'ޖީ7' ގެ އެހެން ގައުމުތަކަށްވުރެ ބޮޑަށް އިނގިރޭސިވިލާތުގެ އިންފްލޭޝަން ރޭޓް މަތިވާނެ ކަމަށް ލަފާކޮށްފައެވެ.

ކަނޑުމަހާއި އެހެނިހެން އިމްޕޯޓް މުދަލުން ޑިއުޓީ ކަނޑާލުމަކީ، ދިރިއުޅުމުގެ ޚަރަދުތައް ކުޑަކުރުމަށްޓަކައި އިނގިރޭސި ސަރުކާރުން އެކުލަވާލާފައިވާ ފުޅާ މަޝްރޫއެއްގެ ބައެކެވެ. 2026 ވަނަ އަހަރަށް ސަރުކާރުން ތައާރަފުކުރި 'ކޯސްޓް-އޮފް-ލިވިންގް' ޕެކޭޖްގައި، ކޮންމެ ގެއަކުން ހަކަތައަށް ކުރާ ޚަރަދުން އެވްރެޖްކޮށް 150 ޕައުންޑް އުނިކޮށްދިނުމާއި، 'ނޭޝަނަލް ލިވިންގް ވޭޖް' 4 އިންސައްތައަށް އިތުރުކުރުމާއި، ފާއިތުވި 30 އަހަރުގެ ތެރޭގައި ފުރަތަމަ ފަހަރަށް ރޭލު ދަތުރުތަކުގެ އަގު ބޮޑުނުކޮށް ހިފެހެއްޓުމުގެ އިތުރުން، 'ޔުނިވާސަލް ކްރެޑިޓް' އިނާޔަތް ދިނުމުގައި ދެ ކުދިންނަށްވުރެ ގިނަ ކުދިން ތިބޭ އާއިލާތަކަށް އޮތް ހުރަސްތައް ނައްތާލުން ހިމެނެއެވެ.

ކާބޯތަކެތީގެ ޑިއުޓީ ކަނޑާލުމަކީ އާންމުންނަށް ލުއި ހޯދައިދިނުމަށް އެކުލަވާލާފައިވާ ދިގު ލިސްޓެއްގެ ތެރޭގައި ހިމެނޭ އެންމެ ކަމެކެވެ. މީގައި މައިގަނޑު އަމާޒަކީ ރާއްޖޭގެ ކަނޑުމަހެއް ނޫނެވެ. އޭގެ ބަދަލުގައި މައިގަނޑު މަގުސަދަކީ އިނގިރޭސިވިލާތުގެ އާންމު ރައްޔިތުން ފިހާރަތަކުން މުދާ ގަންނައިރު ކުރަންޖެހޭ ޚަރަދު ކުޑަކުރުމެވެ.

އިނގިރޭސިވިލާތުގެ ވިޔަފާރީގެ ދާއިރާގެ އިސް ފަރާތްތަކުން ވަނީ، ހަނގުރާމައިގެ ސަބަބުން އުފުލެމުންދާ އަގުތަކާ އަޅާބަލާއިރު، މި ޑިއުޓީ ކަނޑާލުމުގެ ސަބަބުން ކުރާނީ ވަރަށް ކުޑަ އަސަރެއް ކަމަށް ބުނެ އާންމުކޮށް އިންޒާރު ދީފައެވެ. މި ސިނާއަތުގެ މަސްދަރަކުން ހާމަކުރި ގޮތުގައި، ހަކަތައިގެ އަގުބޮޑުވުމުގެ ސަބަބުން އުފެދިފައިވާ އިންފްލޭޝަން މިފަދަ ފިޔަވަޅަކުން ހުއްޓުވޭނެ ކަމަށް ޗާންސެލަރު (މާލީ ވަޒީރު) ގަބޫލުފުޅު ކުރައްވާނަމަ، އެއީ ވަރަށް ހެއްވާ ކަމެކެވެ.

ރާއްޖެއަށް މީގެން ކުރާނެ އަސަރު

މި ނިންމުމުގެ ސަބަބުން ރާއްޖޭގެ މަސްވެރިކަމަށް ލިބޭނެ ފައިދާއަކީ ހަގީގަތެކެވެ. ނަމަވެސް، މިއީ ރާއްޖޭގެ ޚާރިޖީ މަސައްކަތްތަކުން ނުވަތަ ޑިޕްލޮމެސީގެ ތެރެއިން ހޯދި ކާމިޔާބީއެއް ނޫނެވެ.

މިހާރު އޮތް ގޮތުންނަމަ، ރާއްޖެއިން އިނގިރޭސިވިލާތަށް އެކްސްޕޯޓްކުރާ މަހުގެ ބާވަތްތަކުން 20 އިންސައްތައިގެ ޑިއުޓީއެއް ނަގައެވެ. މި އާ އުސޫލާއެކު، އެކްސްޕޯޓަރުންނަށް 2028 ވަނަ އަހަރުގެ ނިޔަލަށް އެއްވެސް ޑިއުޓީއަކާ ނުލައި އިނގިރޭސި ބާޒާރަށް މަސް ބޭރުކުރުމުގެ ފުރުސަތު ލިބިގެންދާނެއެވެ. މަސްވެރިކަމާ ބެހޭ ވުޒާރާއިން ފާހަގަކޮށްފައިވާ ގޮތުގައި، ރާއްޖެއަކީ މިހާރުވެސް އިނގިރޭސިވިލާތަށް ނުވަވަނައަށް އެންމެ ގިނައިން ކަނޑުމަސް އެކްސްޕޯޓްކުރާ ގައުމެވެ. އަދި ރާއްޖޭގެ މަހަކީ ދެމެހެއްޓެނިވި މަސްވެރިކަމުގެ ދާއިރާއިން އެ ބާޒާރުގައި އެންމެ ކުރީގައި އުޅޭ އުފެއްދުމެކެވެ.

މި އޮޅުންބޮޅުމުގެ ސަބަބުން ނުކުންނާނެ ނަތީޖާ

ބޭރު ގައުމެއްގެ ސަރުކާރުން އެ ގައުމުގެ އެތެރޭގެ އިގްތިސާދީ ހާލަތަށް ރިއާޔަތްކޮށް، އަމިއްލައަށް ނިންމި ނިންމުމެއް، އެއީ ދެ ގައުމުގެ ދެމެދުގައި ކުރެވުނު މަޝްވަރާތަކެއްގެ ނަތީޖާގެ ގޮތުގައި ދެއްކުމަކީ އާންމުންނަށް ކަންކަން އޮޅޭނެ ކަމެކެވެ. މިއީ ޚާރިޖީ ގޮތުން ހޯދިފައިވާ ކާމިޔާބީތައް އޮތް މިންވަރަށްވުރެ ބޮޑުކޮށް ދެއްކުމަށް ކުރެވޭ މަސައްކަތެކެވެ. އަދި މިކަމުގެ ސަބަބުން، 2028 ވަނަ އަހަރުގެ ފަހުންވެސް ރާއްޖޭގެ މަސްވެރިކަމުގެ ސިނާއަތް ހިމާޔަތްކުރުމަށްޓަކައި، ދާއިމީ އަދި ރަސްމީ ވިޔަފާރީގެ އެއްބަސްވުމެއް ގާއިމުކުރުމަށް ކުރަންޖެހިފައިވާ މުހިންމު މަސައްކަތްތަކަށް އޮންނަ ސަމާލުކަން ކުޑަވެގެން ހިނގައިދާނެ ކަމެކެވެ.

އިނގިރޭސިވިލާތުން މި ނިންމުން ނިންމީ އެ ގައުމުގެ އާއިލާތަކަށް ކުރިމަތިވެފައިވާ ކާބޯތަކެތީގެ އަގުބޮޑުވުމުގެ ކާރިސާއިން ސަލާމަތްވުމަށްޓަކައެވެ. މީގެ ފައިދާ ކުރާ ގިނަ ގައުމުތަކުގެ ތެރޭގައި ރާއްޖެ ހިމެނުނީ އިއްތިފާގުންނެވެ. އެހެންކަމުން، މިއީ އޭގެ ހަގީގަތް އޮތް ގޮތަށް ސާފުކޮށް ބަޔާންކުރަންޖެހޭ ކަމެކެވެ.

ސަރުކާރަށް އޮތް އަސްލު ގޮންޖެހުމަކީ ވޭތުވެދިޔަ ބާރަ އަހަރުވެސް އޮތް ގޮންޖެހުމެވެ. އެއީ މި ހުޅުވުނު ވަގުތީ ފުރުސަތު ހަމަވުމުގެ ކުރިން، އިނގިރޭސިވިލާތާއެކު ދާއިމީ އަދި ދެމެހެއްޓެނިވި ވިޔަފާރީގެ އެއްބަސްވުމެއް ގާއިމުކުރުމަށް އޮތް ގޮންޖެހުމެވެ.