150 މިލިއަން ޑޮލަރުގެ ލޯނުގެ ބާކީބައި ސަރުކާރުން އިންޑިއާއަށް ދައްކައިފި

2019 ވަނަ އަހަރު ސްޓޭޓް ބޭންކް އޮފް އިންޑިއާއަށް ވިއްކި، 150 މިލިއަން ޑޮލަރުގެ ޓްރެޒަރީ ބިލް (ޓީ-ބިލް)އަށް ދައްކަންޖެހޭ ބާކީ، 50 މިލިއަން ޑޮލަރު މިސަރުކާރުން މިއަދު ދައްކައިފިއެވެ.

މި ޓީބިލް އެސްބީއައިއަށް ވިއްކާފައި ވަނީ، ކޯވިޑް 19ގެ ޢާލަމީ ވަބާގެ ތެރޭގައި، ދުނިޔެއާއި ރާއްޖޭގެ ބޯޑަރުތައް ބަންދުކޮށް ފަތުރުވެރިއައުން ހުއްޓުމާއިއެކު ރާއްޖޭގެ މުޅި އިޤުތިޞާދު ހުއްޓި، ދައުލަތަށް ލިބޭ އާމުދަނީ ލިބުން މުޅިން ބަންދުވުމާއި ގުޅިގެން، އަސާސީ ޚިދުމަތްތަކާއި، ރައްޔިތުންނަށް ފޯރުކޮށްދޭންޖެހޭ އެހެނިހެން ޚިދުމަތްތައް ފޯރުކޮށް ދިނުމަށް، ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައެވެ.

ފިނޭންސް މިނިސްޓްރީން މިއަދު ބުނީ، އެ ފެސިލިޓީގެ އެންމެ ފަހު އިންސްޓޯލްމަންޓް ކަމަށްވާ 50 މިލިއަން އެމެރިކާ ޑޮލަރު ދައްކައި ނިންމުމާއި އެކު އެދަރަނި ދައްކައި މުޅިން ޚަލާސްވީ ކަމަށެވެ.

މި ދަރަނި ދެއްކި ގޮތް:

2024 ޖެނުއަރީ - 50 މިލިއަން ޑޮލަރު

2024 މެއި - 50 މިލިއަން ޑޮލަރު

2026 ސެޕްޓެމްބަރ - 50 މިލިއަން ޑޮލަރު

ރާއްޖޭގެ އިޤުތިޞާދީ ޙާލަތު ގޯސްވެފައި ވީނަމަވެސް ސަރުކާރުން އަންނަނީ، ރާއްޖެއިން ދައްކަންޖެހޭ ބޭރުގެ ދަރަނިތައް ދައްކަމުންނެވެ. އެކަމުގެ ސަބަބުން ރާއްޖޭގެ އިޤުތިޞާދަށް ލޮޅުންތައް އަންނަމުން ދިޔަ ނަމަވެސް ރާއްޖެ ދަރަނުވެރިނުވެ ސަލާމަތްވެވޭނެ ކަމުގެ ޔަޤީންކަން މިސަރުކާރުން އަންނަނީ ދެމުންނެވެ.