ރަސްމާލެ ކުއްޔަށް ދިނުމާއި ދެކޮޅު ހަދަނީ ދިވެއްސެއްކަންވެސް ހަނދާން ނުހުންނަ މީހުން: ރައީސް

ރަސްމާލެ 99 އަހަރަށް ކުއްޔަށް ދިނުމާއި މެދު ކަންބޮޑުވެ ދެކޮޅު ހަދާ މީހުންނަކީ، ދިވެއްސެއްކަންވެސް ހަނދާން ނުހުންނަ މީހުން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިފަކުރައްވައިފިއެވެ،

ރައީސުލްޖުމްހޫރިއްޔާ މިމޭރުމުން ވާހަކަފުޅު ދައްކަވާފައި ވަނީ، ދައުލަތުގެ މީޑިއާ ޕީއެސްއެމްއާއި ރައީސް އޮފީސް ގުޅިގެން ގެނެސްދޭ، "ނޭޝަން ޗެޓް" ޕޮޑްކާސްޓްގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ރަސްމާލެ ޔޫއޭއީގެ ކުންފުންޏަކަށް 99 އަހަރަށް ކުއްޔަށް ދިނުމަކީ، ޤައުމަށް ފައިދާވާނެ ކަމެއް ކަމަށާއި، އެކަމާއި ދެކޮޅު ވަނީ ޤައުމިއްޔަތުގެ ވިސްނުން ނެތުމުން ކަމަށެވެ. އަދި ތަރައްޤީއަށް ކުރެވޭ ކަންކަމާއި ދެކޮޅުވެ ސިޔާސީ ވިސްނުން އިސްކުރެވިގެންދާ ހިސާބަކީ، ތިމާއަކީ ދިވެއްސެއްކަންވެސް ހަނދާން ނެތުން ކަމުގައި ރައީސް ވަނީ ވިދާޅުވެފައެވެ.

މި ޕްރޮގްރާމްގައި ރައީސުލްޖުމްހޫރިއްޔާ ވިދާޅުވީ، 99 އަހަރަށް ރަސްމާލޭގެ ބޮޑުބައެއް ކުއްޔަށްދީ، އެތަނުގައި ބިދޭސީން ވަޒަންވެރިވެ އިންފްރާސްޓްރަކްޗަރތައް ޤާއިމްވެގެން ދިޔުމަކީ، އަންނަން އޮތް ޖީލުތަކަށް އޭގެން ވަރަށް ފައިދާ ކުރާނެ ކަމެއް ކަމަށެވެ.

ރަސްމާލޭގެ ބިމުން 500 ހެކްޓަރުގެ ބޮޑު ބައެއް، 99 އަހަރަށް، އީގަލް ހިލްސްއަށް ދޭއިރު، އެ އެއްބަސްވުމުގައި، މިލްކުވެރިކަން ބަދަލުކުރާ ކޮންމެ ފަހަރަކު އަލުން 99 އަހަރު ގުނަން ފަށާގޮތަށް އޮތުމަކީ، ދެން އެތަން ދުވަހަކުވެސް ދިވެހިދައުލަތަށް އަނބުރާ ލިބުމެއްނެތި، ތާއަބަދަށް ގެއްލިގެންދާނޭ ކަމެއް ކަމުގައި، މިމަޝްރޫޢާއި ދެކޮޅަށް ވާހަކަ ދައްކާ ފަރާތްތަކުން ފާހަގަކޮށްފައި ވެއެވެ.

މީގެ އިތުރުން އެމަޝްރޫޢުގެ އަގަކީ، ޖުމުލަ 20 ބިލިއަން ޑޮލަރުކަމުގައި ސަރުކާރުން ބުނެފައި ވާއިރު، އީގަލްސް ހިލްސްއިން އެމަޝްރޫޢުގެ އަގުގެ ގޮތުގައި ހާމަކޮށްފައި ވަނީ 12 ބިލިއަން ޑޮލަރެވެ. އަދި އެބިން، ސަރުކާރުން އީގަލްސް ހިލްސްއަށް ދެނީ، އަޕްފްރޮންޓްކޮށް އެއްވެސް ފީއެއް ނުވަތަ އިކުއިޒިޝަން ކޮސްޓްއެއް ނެގުމަކާއި ނުލައި، އިމާރާތް ކުރުމަށް މުޅިން ހިލޭކަން ސަރުކާރުން ހާމަކުރަމުން އަންނަ މައުލޫމާތުތަކުން މިހާރު ވަނީ ހާމަވެފައެވެ.