ނިވާކަން ކުޑަގޮތަށް ހެދުން އަޅާ ބިދޭސީންނަށް ފިޔަަވަޅު އަޅަނީ

މިހާރަކަށް އައިސް، ބިދޭސީން މަގުމަތީގަޔާއި އާއްމު ތަންތަނުގައި ނިވާކަން ކުޑަކޮށް ހެދުން އަޅައިގެން އުޅޭކަން ފާހަގަކުރެވިފައިވާ ކަމަށާއި އެފަދަ ފަރާތްތަކާިއ މެދު ފިޔަވަޅު އަޅާނެ ކަމުގައި ފުލުހުންގެ އިދާރާއިން ބުނެފިއެވެ.

ފުލުހުންގެ އިދާރާއިން މިހެން ބުނެފައި ވަނީ، ފުލުހުންގެ ޚިދުތުން މިއަދު ނެރެފައިވާ ބަޔާނެއްގައެވެ.

ފުލުހުންގެ އިދާރާއިން ވިދާޅުވީ، ބައެއް ބިދޭސީންގެ މިފަދަ އަމަލުތަކަކީ މުޖުތަމައުގެ އާންމު ސުލޫކު އަދި އަހުލާގީ މިންގަނޑުތަކާ ހިލާފު އަމަލުތަކެއް ކަމަށެވެ. މިގޮތުން އާންމު އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނުގެ ދަށުން އެފަރާތްތަކާއި މެދު ފިޔަވަޅުތައް އަޅަމުން ގެންދާނެ ކަމުގައި ވެސް ފުލުހުންގެ އިދާރާއިން ވިދާޅުވިއެވެ.

އަދި ބިދޭސީން ވަޒީފާގައި ގެންގުޅޭ ފަރާތްތަކުން ބިދޭސީންގެ ކިބައިން އެފަދަ ޢަމަލުތައް ނުފެންނާނޭ ގޮތަށް އެފަރާތްތައް ހޭލުންތެރި ކުރުވުމަށްވެސް އިލްތިމާސްކޮށްފައިވެއެވެ.

ފުލުހުން މިބަޔާން ނެރެފައި މިވަނީ، ރާއްޖޭގައި ދިރިއުޅޭ ބިދޭސީ އަންހެނުންގެ ތެރެއިން، ޚާއްޞަކޮށް ނޭޕާލަށާއި، ތައިލެންޑަށް ނިސްބަތްވާ އަންހެނުން ނިވާކަން ކުޑަ ހެދުންތަކުގައި މަގުމަތީގަޔާއި އާއްމު ތަންތަނުގައި އުޅޭތީ، އެކަމުގެ ކަންބޮޑުވުން ބައެއް ފަރާތްތަކުން ސޯޝަލް މީޑިއާގައިވެސް ޙިއްޞާކޮށްފައި ވަނިކޮށެވެ.