ތިން އަހަރުގެ އަންހެން ދަރިފުޅަށް ޖިންސީ ގޯނާކޮށް އެމަންޒަރުތައް ރެކޯޑްކުރި ބައްޕަޔަކު ހައްޔަރުކޮށްފި

އުމުރުން 3 އަހަރުގެ، އުފަން އަންހެންދަރިއަކަށް ޖިންސީގޯނާކޮށް، އެމަންޒަރުތައް ރެކޯޑުކުރި ބައްޕަޔަކު ހައްޔަރުކޮށްފިއެވެ.

ފުލުހުންގެ މީޑިއާ އޮފިސަރު، ވިދާޅުވީ، ސައުތު ސެންޓްރަލް ޕޮލިސްގައި ހިމެނޭ ރަށެއްގައި ތިން އަހަރުގެ ކުޑަކުއްޖަކަށް ޖިންސީ ގޯނާކޮށް، އެ މަންޒަރުތައް ރެކޯޑްކުރި ކަމަށް ތުހުމަތުކުރެވޭ މައްސަލައަކާ ގުޅިގެން 28 އަހަރުގެ ދިވެހި ފިރިހެނަކު ކޯޓު އަމުރެއްގެ ދަށުން މިދިޔަ ހުކުރު ދުވަހު ހައްޔަރުކޮށްފައިވާ ކަމަށެވެ.

އަދި އޭނާގެ ބަންދާމެދު ގޮތެއް ނިންމުމަށް ހަމަ އެ ދުވަހު ކޯޓަށް ހާޒިރުކުރުމުން، 30 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައިވާ ކަމުގައިވެސް ފުލުހުންގެ އިދާރާއިން ވިދާޅުވެއެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.

ކުޑަކުދިންނަށް ޖިންސީ ގޯނާކުރުމުގެ ތުހުމަތުގައި ހައްޔަރު ކުރެވޭ، ފަރާތްތަކުގެ ނަމާއި ވަނަވަރު ފުލުހުން އަދި ކަމާއި ބެހޭ ފަރާތްތަކުން އާއްމު ނުކުރަނީ، ކުޑަކުއްޖާގެ ކަރާމާތާއި ޙައްޤުތައް ރައްކާތެރިކުރުމަށްޓަކައެވެ.