ސަރުކާރުން ބޭނުންވެއްޖެ ހިނދެއްގައި ބިންތައް އަތުލެވޭ އިސްލާޙް ތަސްދީޤު ކުރައްވައިފި

ކައުންސިލްތަކުގެ އިޙްތިސާސްގެ ދަށުގައިވާ ބިންތައް ސަރުކާރަށް އަތުލެވޭ ގޮތަށް ޤާނޫނަށް އިސްލާޙް ގެނައުމަށް ފާސްކުރި ބިލް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީޤު ކުރައްވައިފިއެވެ.

މި ބިލު ފާސްކުރައްވާފައިވަނީ، 2026 އޮގަސްޓު 26 ވީ ބުދަ ދުވަހު ބޭއްވެވި، 20 ވަނަ ރައްޔިތުންގެ މަޖިލީހުގެ 2026 ވަނަ އަހަރުގެ ދެވަނަ ދައުރުގެ 28 ވަނަ ޖަލްސާއިންނެވެ.

މި އިޞްލާޙުގެ މަގުސަދަކީ، ސަރުކާރުގެ ތަރައްޤީގެ މަޝްރޫޢުތައް ހަލުވި ދުވެއްޔެއްގައި ކުރިއަށް ގެންދިއުމަށްޓަކައި ޤާނޫނީ އޮނިގަނޑެއްގެ ތެރެއިން ކައުންސިލްތަކުގެ ފުރިހަމަ އެއްބާރުލުން ކަށަވަރުކުރުމާއި، ދައުލަތުގެ މަޝްރޫޢުތަކަށް ބޭނުންވާ ބިންތަކާ ގުޅޭ އިޖުރާތުތައް ހަރުދަނާކުރުމަށްޓަކައި، ޤާނޫނަށް ގެންނަންޖެހޭ އިޞްލާޙުތައް ގެނައުން ކަމުގައި ސަރުކާރުން ވަނީ ބުނެފައެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް 19 ވަނަ އިޞްލާޙު ގެނައުމުގެ މި ބިލު މަޖިލީހަށް ހުށައެޅީއްސުރެ ކައުންސިލްތަކުން ދިޔައީ އެކަމުގެ ކަންބޮޑުވުންތައް ފާޅުކުރަމުންނެވެ.