ރޭ ހައިވޭގައި ހިނގި އެކްސިޑެންޓްގައި ނިޔާވީ މޯލްޑިވިއަންގައި މަސައްކަތް ކުރާ އިންޑިއާ މީހެއް

ރޭ ހައިވޭގައި ހިނގި އެކްސިޑެންޓްގައި ނިޔާވީ، އުމުރުން 50 އަހަރުގެ އިންޑިއާ ފިރިހެނެއްކަމުގައި ފުލުުންގެ އިދާރާއިން ވިދާޅުވެއްޖެއެވެ.

ރޭގެ ހާދިސާގައި ނިޔާވި މީހާއަކީ، ޤައުމީ އެއާލައިން މޯލްޑިވިއަން ހިންގަމުން އަންނަ އައިލޭންޑް އޭވިއޭޝަންގެ މުވައްޒަފެއް ކަމުގައިވާ، ދޭވާ ރާޖަން ޔެސޫ ދާސަން އެވެ. އޭނާ ނިޔާވުމާއި ގުޅިގެން އައިލެންޑް އޭވިއޭޝަނުން ވަނީ އެކަމުގެ ހިތާމަފާޅުކޮށް ތައުޒިޔާ ފޮނުވާފައެވެ.

ރޭގެ ހާދިސާ ހިނގާފައި ވަނީ، ދޭވާ ރާޖަން ދުއްވި ސައިކަލު ކަހާލައި އޭނާ ވެއްޓުނު ވަގުތު ފަހަތުން އައި ލޮރީއެއް އޭނާގެ ގައިމަތިން ދިޔުމުގެ ސަބަބުންނެވެ.

ރޭ 22:12 ހާއިރުގައި ހިނގި މިއެކްސިޑެންޓްގައި އޭނާ ވަނީ ވަގުތުން މަރުވެފައެވެ. ފުލުހުންގެ އިދާރާއިން ވިދާޅުވީ، މި މައްސަލަ ތަޙްޤީޤު ކުރަމުން އަންނަ ކަމަށެވެ.