އެމްޑީޕީގެ ޤައުމީ މަޖިލީހުގެ އިންތިޚާބުގައި ވާދަކުރުމަށް ބޭނުންވާ ފަރާތްތަކަށް ފުރުޞަތު ހުޅުވާލައިފި

އިދިކޮޅު އެންމެ ބޮޑު ޕާޓީ އެމްޑީޕީންވާ އެޕާޓީގެ ޤައުމީ މަޖިލީހުގެ މަޤާމުތަކަށް ވާދަކުރަން ބޭނުންވާ ފަރާތްތަކަށް މިއަދު ފުރުޞަތު ހުޅުވާލައިފިއެވެ.

އެމްޑީޕީން ހާމަކޮށްފައިވާ ގޮތުގައި، ޤައުމީ މަޖިލީހުގެ މަޤާމުތަކަށް ކުރިމަތި ލެވޭނީ، މި ހިނގާ އޮކްޓޫބަރު މަހުގެ 20 ވަނަ ދުވަހުގެ 2:00 އާއި ހަމައަށް އެޕާޓީގެ މެމްބަރުންގެ ގޮތުގައި ރަޖިސްޓްރީވެފައިވާ ފަރާތްތަކަށެވެ. އަދި ޕާޓީގެ ރަޖިސްޓްރީއަށް ބަލައި ރަށްތަކުންނާއި ސިޓީތަކުން ހޮވާނެ މެމްބަރުންގެ އަދަދުވެސް ކަނޑައެޅިގެންދާނީ، އެދުވަހުގެ ފަހުން ކަމުގައި އެމްޑީޕީން ވަނީ ހާމަކޮށްފައެވެ.

އެމްޑީޕީގެ ޤައުމީ މަޖިލީހުގެ އިންތިޚާބުގައި ވާދަކުރަން ކެންޑިޑެންސީ ހުށައަޅާއިރު، ކޮންމެ މެމްބަރަކުވެސް 1000ރގެ އިދާރީ ފީއެއް ދައްކަން ޖެހެއެވެ. އަދި އިންތިޚާބުގައި ވާދަކުރުމަށް ހުށައަޅަންޖެހެނީ، އެޕާޓީގެ އެޕްލިކޭޝަން ޔެލޯ މެދުވެރިކޮށެވެ.

އެމްޑީޕީން އެޕާޓީގެ ޤައުމީ މަޖިލީހުގެ އިންތިޚާބު ބޭއްވުމަށް ނިންމާފައި ވަނީ، އަންނަ ނޮވެމްބަރު މަހުގެ 27 ވަނަ ދުވަހުގައެވެ.