ޤުރުއާން ކިޔަވައިދޭ ކްލާސްތަކުގައި ބައިވެރިވުމުގެ ފުރުޞަތު ޢުލޫމުލް ޤުރުއާންއިން އޮތީ ހުޅުވާލާފައި

ޢުލޫމުލްޤުރުއާން ޤުރުއާން ކުލާހުގައި، ބަލައިގެން ތަޖުވީދުގެ މަގުން ރީތިކޮށް ކިޔަވައި ދިނުމުގެ އިތުރުން، މުޅި ޤުރުއާން ހިތުދަސްކުރަން ބޭނުންވާ ކުދިންނަށްވެސް ކުލާސްތައް ހިންގައެވެ. ޢުލޫމުލް ޤުރުއާންގެ ކުލާސްތަކުގައި، ބޭބީ ނާސަރީއިން ފެށިގެން ގްރޭޑް 10 އާއި ހަމައަށް ސްކޫލުތަކުގައި ކިޔަވާ އުމުރުފުރާގެ ހުރިހާ ދަރިވަރުންނަށްވެސް ކިޔަވައިދޭއިރު، މަތީ ގްރޭޑްތަކުގެ ކުދިންނަށްވެސް ޚާއްޞަކޮށް ކުލާސްތައް އަންނަނީ ހިންގަމުންނެވެ. އަދި ހުރިހާ އުމުރުފުރާއެއްގެ ކްލާސްތަކުގައި ކިޔަވާ ދަރިވަރުން ހޯދަމުންދާ ކުރިއެރުންތައް ވަޒަން ކުރުމާއި އެކު، ޢުލޫމުލްޤުރުއާންގެ އަހަރީ އިނާމް ދިނުމުގެ ޖަލްސާ ކޮންމެ އަހަރަކު އަންނަނީ ބާއްވަމުންނެވެ.

މިގޮތުން ކޮންމެ އަހަރަކުވެސް ޢުލޫމުލްޤުރުއާންގެ އަހަރީ އިނާމް ދިނުމުގެ ޖަލްސާގައި ދަރިވަރުންނަށް ދެމުން އަންނަ އެވޯޑުތަކުގެ ތެރޭގައި:

• ހާޟިރީ އެވޯޑް

• ޚަތިމް ނިންމާ އެވޯޑް

• ދަރިވަރު ހިތު ދަސްކުރާ ކޮންމެ ފޮތަކަށް، ދޭ އެވޯޑް. (އެއަހަރެއްގައި ހިތުދަސްކުރި ކޮންމެ ފޮތަކަށް ވަކި އެވޯޑެއް ލިބޭނެ.)

• ކޮންމެ ކުލާހަކުން އެންމެ މޮޅު ދަރިވަރަށް ދެވޭ އެވޯޑު؛ ހިމެނެއެވެ.

މިއިން ކޮންމެ އެވޯޑެއް ޙާސިލްކުރާ ދަރިވަރަކަށްވެސް، ޓްރޮފީ އާއި އިނާމާއި، ހަނދާނީ ލިޔުމެއް އަންނަނީ ދެމުންނެވެ. ޚާއްޞަކޮށް ޚަތިމް ނިންމުމުން އެކަން ފާހަގޮށް އަދި ކޮންމެ ފޮތެއް ނިންމުމުން އެކަން ފާހަގަކުރުމަށްވެސް، ޓްރޮފީ އާއި އިނާމާއި ހަނދާނީ ލިޔުން އަންނަނީ ދެމުންނެވެ.

މީގެ އިތުރުން، ކޮންމެ އަހަރެއްގެ އަހަރީ އިނާމް ދިނުމުގެ ޖަލްސާގައި، ޤުރުއާން ޓީޗަރުންގެ އަގު ވަޒަންކޮށް ޤުރުއާން ކިޔަވައިދެއްވާ ޓީޗަރުންނަށްވެސް ޚާއްޞަ އެވޯޑުތައް ދެމުން ގެންދެއެވެ.

ޢުލޫމުލް ޤުރުއާންގެ ވެރިޔާ އައިޝަތު ޝާފިޢާ ވިދާޅުވީ، ޢުލޫމުލްޤުރުއާންއިން އަހަރީ އިނާމްދިނުމުގެ ޖަލްސާ ބާއްވައި، ދަރިވަރުންނަށް ޓްރޮފީ އާއި ހަނދާނީ ލިޔުން ދިނުމުގެ އެންމެ ބޮޑު މަޤުޞަދަކީ، އެއް މަރުޙަލާއިން އަނެއް މަރުޙަލާއަށް ކިޔަވައި، ކުރިޔަށް ދިޔުމަށް ދަރިވަރުންގެ ޝައުޤުވެރިކަން އިތުރުކޮށް ހިއްވަރު ދިނުމާއި ކުދިންގެ ޝައުޤުވެރިކަން އިތުރުކުރުން ކަމަށެވެ. މިގޮތުން ކޮންމެ އަހަރެއްގެވެސް އަހަރީ އިނާމު ދިނުމުގެ ޖަލްސާއަށް ޚާއްޞަ އިސްކަމެއް ދީގެން ބޮޑު ހޭދައެއް ކުރައްވާ ކަމުގައި ޝާފިޢާ ވިދާޅުވިއެވެ.

ޤުރުޢާންކިޔަވައި ދިނުމާއި ޤުރުއާންގެ ޢިލްމު އުނގަންނައިދިނުމުގެ އިތުރުން، ކޮންމެ އަހަރަކުވެސް ޢުލޫމުލް ޤުރުއާންއިން އަންނަނީ އެޤުރުއާން ކުލާހުގައި ކިޔަވާ ދަރިވަރުންނަށް ޚާއްޞަކޮށް، ޤުރުއާން މުބާރާތް ބާއްވަމުންނެވެ. މިގޮތުން ޤުރުއާން މުބާރާތުގައިވެސް އެކި އުމުރުފުރާތަކުން ބަލައިގެން ކިޔެވުމުގެ ގޮފިންނާއި ނުބަލައި ކިޔެވުމުގެ ގޮފިން ވަނަވަނައަށް ހޮވޭ ދަރިވަރުންނަށާއި، މުޅި މުބާރާތުގެ ދެގޮފިން ފަޚުރުވެރި ވަނަތައް ޙާޞިލްކުރާ ދަރިވަރުންނަށާއި، މުޅި މުބާރާތުން 1ވަނަ 2ވަނަ އަދި 3 ވަނަ ހޮވައި، އެދަރިވަރުންނަށް ޓްރޮފީ އާއި އިނާމާއި ހަނދާނީ ލިޔުން އަންނަނީ ދެމުންނެވެ.

ކޮންމެ އަހަރަކުވެސް ޢުލޫމުލްޤުރުއާންގެ ކްލާސްތަކުގައި ކިޔަވާ ދަރިވަރުންނަށް ޚާއްޞަކޮށް ބާއްވަމުން އަންނަ ޢުލޫމުލް ޤުރުއާން، ޤުރުއާންކިޔެވުމުގެ މުބާރާތް މިއަހަރުވެސް ވަނީ ބާއްވާފައެވެ. އެކި ޢުމުރުފުރާތަކަށް ބަހާލައިގެން ،ބަލައިގެން ކިޔެވުމުގެ ގޮތްޕާއި ނުބަލައި ކިޔެވުމުގެ ގޮފި ހިމަނައިގެން ބޭއްވި އެ މުބާރާތުގައި 200އަށް ވުރެ ގިނަ ދަރިވަރުން ބައިވެރިވިއެވެ.

ކޮންމެ އަހަރެއްގެ އެވޯޑް ހަފްލާ އާއި ޤުރުއާން މުބާރާތުގެ ނަތީޖާފާޅުކުރުމުގެ ޖަލްސާ އެއް އަހަރަށްވުރެ އަނެއް އަހަރު ކުލަ ގަދަކޮށް ބާއްވަމުން އަންނައިރު، މިއަހރުގެ ޖެނުއަރީ މަހު އެޖަލްސާ ބާއްވާފައި ވަނީ، އިސްލާމީ މަރުކަޒުގެ ޖަލްސާ ކުރާ މާލަމްގައެވެ.

ޢުލޫމުލް ޤުރުއާންގެ 4 ގޮތްޕެއް މިހާރު މާލޭގެ ހަތަރުއަވަށުގައި ވަނީ ޤާއިމްކޮށްފައެވެ. މިގޮތުން، މައްޗަންގޮޅި، މާފަންނު އަދި ގަލޮޅުގައިވެސް ގޮފިތައް ވަނީ ޤާއިމްކޮށްފައެވެ. އެންމެ ފަހުން ޢުލޫމުލްޤުރުއާންގެ 4 ވަނަ ގޮފި ހުޅުވާފައި މިވަނީ، ހެންވޭރުގައެވެ. ޢުލޫމުލްޤުރުއާންގެ ކްލާސްތަކުގައި 18 އަހަރުން ދަށުގެ ހުރިހާ އުމުރުފުރާއެއްގެ ކުދިންނަށްވެސް ކިޔެވުމުގެ ފުރުޞަތު އޮތީ ހުޅުވާލާފައެވެ. ދަރިވަރުން ކުލާސްތަކުގައި ރަޖިސްޓްރީކުރެއްވުމަށް ގުޅުއްވާނީ، 9940142އަށެވެ.