އަތް އުފުލައި ނެގި ވޯޓަކުން ޕީއެންސީގެ ރިޔާސީ ޓިކެޓް ރައީސް ޑރ. މުޢިއްޒަށް ވެދުންކޮށްފި

ވެރިކަންކުރާ ޕީޕަލްސް ނެޝަނަލް ކޮންގްރެސް (ޕީއެންސީ)އިން 2028 ވަނަ އަހަރުގެ ރިޔާސީ އިންތިޚާބުގައި ވާދަކުރާނެ ކެންޑިޑޭޓްގެ ގޮތުގައި މިހާރުގެ ރައީސް ޑރ. މުޙައްމަދު މުޢިއްޒުކަމަށް ކަނޑައި އެމަނިކުފާނަށް، ޕާޓީގެ ކޮންގްރެސްގައި ބައިވެރިވި މެމްބަރުން އިއްތިފާޤުން ރިޔާސީ ޓިކެޓް ވެދުންކޮށްފިއެވެ.

2028 ގެ ޕީއެންސީގެ ރިޔާސީ ޓިކެޓް ރައީސް ޑރ. މުޙައްމަދު މުޢިއްޒަށް އެރުވުމަށް، ކޮންގްރެސް އަށް ހުށައެޅުއްވީ، ފުވައްމުލަކު ދެކުނު ދާއިރާގެ ހާއްސަ މަންދޫބު އަބްދުﷲ އިބްރާހީމްއެވެ. އެ ގަރާރުގައި ބުނެފައި ވަނީ، ރައީސް ޑރ. މުޙައްމަދު މުޢިއްޒު ކުރައްވަމުން ގެންދަވާ ޚިދުމަތް މެދުކެނޑުނަ ނުދިނުމަށްޓަކައި އެ މަނިކުފާނަށް ދެވަނަ ރިޔާސީ ދައުރެއް ޙައްޤުވާ ކަމަށެވެ.

ޕީއެންސީގެ އަސާސީ ޤަވާއިދު ބުނާ ގޮތުން، ހިނގަމުންދާ ރިޔާސީ ދައުރުގައި، ރައީސުލްޖުމްހޫރިއްޔާގެ މަޤާމުގައި ހުންނެވި ބޭފުޅަކީ، އެޕާޓީގެ މެމްބަރެއް ނަމަ، އަދި ރައީސުލްޖުމްހޫރިއްޔާ ދެވަނަ ދައުރަކަށް ކުރިމަތިލެއްވުމަށް ޕާޓީގެ މެމްބަރުންގެ މަހިލީހަށް ހުށައަޅައިފިނަމަ، ޕްރައިމަރިއަކާއި ނުލައި އެބޭފުޅަކަށް ރިޔާސީ ޓިކެޓް ދެވޭނެއެވެ.

ރައީސް ޑރ. މުހައްމަދު މުޢިއްޒަށް ރިޔާސީ ޓިކެޓް ދިނުމަށް ހުށައެޅި އެޤަރާރަށް އެހި ވޯޓުގައި، 1119 މެމްބަރުން ވޯޓު ދިނެވެ. މި ވޯޓުނަގާފައި ވަނީ، އަތް ހިއްލައިގެން ހާމަކަން ބޮޑުގޮތެއްގައެވެ.