މަސްޖިދުލް ހަރާމްގެ އިމާމު ރާއްޖެވަޑައިގަންނަވަނީ

މަސްޖިދުލްޙަރާމްގެ އިމާމު އަދި ޚަތީބު ފަޟީލަތުއްޝައިޚު ޑރ ޔާސިރް އައްދައުސަރީ ރާއްޖެ ވަޑައިގެންނެވުމަށް ހަމަޖެހިފައިވާ ކަމުގައި، މިނިސްޓަރ އޮފް އިސްލާމިކް އެފެއާޒް ޑޮކްޓަރ މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެމަނިކުފާނު މިކަން ހާމަކުރެއްވީ، ކީރިތި ޤުރްއާން ކިޔެވުމުގެ 38 ވަނަ ޤައުމީ މުބާރާތުގެ ނަތީޖާ ފާޅުކުރުމުގެ ރަސްމިއްޔާތުގައި ވާހަކަފުޅު ދައްކަވަމުންންނެވެ. މަސްޖިދުލްޙަރާމްގެ އިމާމު ރާއްޖެ ވަޑައިގަންނަވާގޮތަށް ހަމަޖެހިފައިވާކަން އިޢުލާނު ކުރެއްވުން ފިޔަވައި އެކަމާއި ގުޅޭ އިތުރު މައުލޫމާތެއް މިނިސްޓަރ ޝަހީމް ހާމައެއް ނުކުރައްވައެވެ.

މިނިސްޓަރ އޮފް އިސްލާމިކް އެފެއާޒުން ހާމަކުރައްވާ ގޮތުގައި، އެންމެ ފަހުން މަސްޖިދުލް ޙަރަމްގެ އިމާމަކު ރާއްޖެވަޑައިގެންފައި ވަނީ މީގެ 43 އަަހަރު ކުރިންނެވެ. އެ ފަހަރު މަސްޖިދުލްޙަރާމްގެ އިމާމު ރާއްޖެވަޑައިގެންފައި ވަނީ، ރައީސް މައުމޫނުގެ ދައުރުގައި، އޭރު ރާއްޖޭގައި ހުޅުވުނު އެންމެ ބޮޑު މިސްކިތް މަސްޖިދުލްސުލްޠާން މުޙައްމަދު ތަކުރުފާނުލްއަޢުޡަމް ހުޅުވުމަށެވެ.

މިދިޔަ އަހަރު، މަސްޖިދުއްނަބަވީގެ އިމާމު ފަޟީލަތުއްޝައިޚް ޑރ. ޞަލާޙުލް ބުދައިރުވެސް ރާއްޖެއަށް ވަޑައިގެންނެވިއެވެ.